Ат баспаган асканын
Аралай басып ак карын,
Жайыттап күнгөй-тескейди
Кой болду менин бакканым.
Тээтиги сары кыр жакка,
Чойт, эркечим! Чойт, эркечим, баштагын.

Ат жетпеген асканын,
Мен бастым шагыл, таштарын,
Кой баккан сонун турбайбы
Балалык ойду таштадым.
Тээтиги Кара-Шорого
Чойт, эркечим, Чойт, эркечим, баштагын.

Дегеле келбейт чарчагым,
Аңкыса жыты арчанын,
Кыз сүйгөндөй болосуң
Сылап саамай чачтарын
Күн кечтеп кетти короого
Чойт, эркечим. Чойт, эркечим, баштагын.

Ал мезгил менин эсимде,
Али да сонун сезимде.
Ар дайым күтүп барчумун,
Алтынчы күнү кечинде.

Сүйүү оту жанса көзүңдө,
Сүйүнүч турса өзүңдө.
Сабактан бошоп барчумун,
Алтынчы күнү кечинде.

Чырдашпай келип чечимге,
Чыгарбай сырды эч кимге.
Диплом алдың, сөз бердиң,
Алтынчы күнү кечинде.

Эртелеп барсам бешимде,
Экзамен бүткөн кезинде.
Ашыкпа дедиң, той болот,
Алтынчы күнү кечинде.

Өзүмдү көрүп көзүңдөн,
Өкүнүч, кайгым өчүргөм.
Жазылдың таалай багыма,
Табышмак сырдуу өмүрдөн.
Тирегим менин, тирегим менин
Табышмак сырдуу өмүрдө

Жанашып бирге басканда,
Жарыгым жетип асманга.
Жүрөктөр калды байланып,
Бир болуп дайым ак таңда.
Түгөйүм менин, күйөрүм менин
Бир болуп дайым ак таңда.

Жүрөктү ороп жалынга
Жүрөлү сүйүү багында
Жыргалын сезип алалы,
Жаштыктын деми барында.
Жүрөгүм менин, түнөгүм менин,
Жаштыктын деми барында.

Убара салып жаш жанга,
Убакыт бизден шашканда.
Эмнеге санаа тартамын,
Ээрчишип катар басканда
Ардагым менин, жажалым менин
Ээрчишип катар басканда
Ардагым менин, жажалым менин
Сен болсоң болду жанымда.

Билбейм кайдан жаралгансың сен мага?
Маңдайыма бүткөн жалгыз бакыттай.
Сени сүйдүм, буйрук алып тагдырдан,
Башкалардын миңи сага татыбай!

Же болбосо сен жаралып мен үчүн,
Төрөлгөндө мендик болуп төрөлдүң.
А болбосо, айтчы, жаным, эмне үчүн,
Зарлап тапкан перзентимдей көрүндүң?

Биз жолуктук майдын жумшак түнүндө,
Ал түн мага сени эскерткич белектей.
Мен сүйлөсөм сенин үнүң үнүмдөй,
Мен көрүүгө сенин көзүң керектей.

Уктаганда сенин уйкуң менде бар,
Ойлорум да ойлоруңа киришкен.
Сен экөөбүз эки сандай барабар,
Сен экөөбүз эки суудай бириккен.

Биз экөөбүз эки сандай барабар,
Биз экөөбүз эки суудай бириккен.

Ичимде күйгөн жалын бар,
Издесем түгөй табылар.
А бирок көлгө конбосоң,
Ак куулар сени сагынар.

Тагдырга ар ким кезигет,
Таасири күчтүү сезилет.
Кечикпей ушул турмушта,
Жолуксам деймин тезирээк.

Турмуштун ар кыл даамы бар,
Тузу бар, ширин балы бар.
Айланып көлгө конбосоң,
Ак куулар сени сагынар.

Алманын гүлдүү шагы бар,
Ай тийген түндүн таңы бар.
Акыры көлгө конбосоң,
Ак куулар сени сагынар.

Ал күндөр менин эсимде,
Али да сонун сезимде.
Ар дайым күтүп турчумун,
Алтынчы күнү кечинде.

Ак сүйүү турса көзүңдө,
Кубаныч турчу өзүмдө.
Сабактан бошоп сырдаштык,
Алтынчы күнү кечинде.

Эртелеп барсам бешимде,
Чыгарбай сырды эч кимге.
Ашыкпа дедиң, той болот,
Алтынчы күнү кечинде.

Ай чыкканда балбылдап,
Айды көрсөм сени көрүп,
Тиктей берем жалдырап.
Айдан табам элесиңди,
Айдан түшүп келесиңби?
Келесиңби, келесиңби, жан эркем?

Суу жээгинде кылчактап,
Сууну көрсөм сени көрүп,
Тиктей берем кылчактап.
Суудан табам элесиңди,
Суудан чыгып келесиңби?
Келесиңби, келесиңби, жан эркем?

Жылдыз болуп койнума,
Күлүп келчи, эркелечи,
Колун коюп мойнума.
Жүрөк какшайт, не кылайын?
Кара көзүм, кагылайын,
Ананайын жан эркем.
Ананайын, ананайын жан эркем.

Ай чыкканда балбылдап,
Айды көрсөм сени көрүп,
Тиктей берем жалдырап.
Айдан табам элесиңди,
Айдан түшүп келесиңби?
Келесиңби, келесиңби, жан эркем?
Келесиңби деги сен?