Тааныбай турасың, эстечи,
Жаштыктан алыстап кетпечи.
Көчөңдөн ышкырып чакырган,
Ошол ким, ким эле, эстечи?..

Кайырма:
Карабай жол узак, көптүгүн,
Кечкурун айылыңа жетчүмүн.
Мен сени үйүңдөн чыкса деп,
Калп эле ышкырып өтчүмүн.

Сен мага жайнаган күн элең,
Сен мага кыпкызыл гүл элең.
Эңсетип жүрөктү чаңкаткан,
Өмүрдө чертилбес күүм элең.

Кайырма:

Айларды, жылдарды чектей жүр,
Жабыркап сарсанаа чекпей жүр.
Көчөңдөн ышкырып чакырган
Жигитти унутпай эстей жүр.

Кайырма:

Тоюңарды алыстан угуп келдик, эки жаш,
Кечеңерге ыр майрам, куруп келдик эки жаш.
Үзүлбөсүн колуңар, куттуу болсун тоюңар,
Белек кылып бул ырды, сунуп келдик эки жаш.

Кубанчыңар кайгыга чөмүлбөсүн, эки жаш,
Кулачыңар биригип сөгүлбөсүн, эки жаш.
Эң биринчи достошкон, эми минтип баш кошкон,
Экөөңөргө кудайым бакыт берсин, эки жаш,
Өмүр берсин эки жаш.

Бир-бирине түбөлүк байланышсын, эки жаш,
Эл суктанган түгөйгө айланышсын, эки жаш.
Өздөн артык өз болор, экөөңөргө бел болор,
Өкүл ата-энелер шайланышсын, эки жаш.

Дасторконуң дайыма жайыл болсун эки жаш,
Урпагыңар көбөйүп, айыл болсун эки жаш.
Көшөгөңөр көгөрсүн, наристелер төрөлсүн,
Калың журттун батасы, кабыл болсун эки жаш.
Эл журтумдун батасы, кабыл болсун эки жаш.

Өмүрүмдүн жалгыз арманы,
Өкүнүчтүү жансыз салмагы.
Өзүң деген ыйык тилегим,
Өргө жетпей өксөп алганын.
Бирок неге жүрөк унутпай,
Жол кароодон дале талбады, талбады.

Кайырма:
Курчап алып мени кусалык,
Сени күткөн күндөр узарып.
Өмүр токтоп, ошол кербендер,
Отургансыйт жылбай тушалып, тушалып.
Түшкө кирсең кээ бир түндөрдө ,
Туш тарабым калат кут алып.

Санааланган ысык жаш тамып,
Самабадым неге башканы?
Жазда кирген ал куу дайрадай,
Сагынчымдын ашып-ташканы.
Сени сүйгөн баатыр мен белем?
Бузгум келет зоону, асканы, асканы.

Кайырма:

Кечирип кой, жаным, эрмегим,
Кыялымсың кымбат сен менин.
Тынч ала албас мендеги жөрүктүн,
Тереңине катып келгеним.
Түбөлүктүү сенин энчиңе,
Тун сүйүүмдү арнап бергеним, бергеним.

Кайырма:

Ошол түнү жүрөк сыры чечишип,
Көл жээгинде көпкө жүрдү кыз-жигит.
Кетеринде сүйгөнүнүн колуна,
Кетти жигит алтын шакек кийгизип.

Өттү күндөр тентек соккон шамалдай,
Өзгөрүлдү кыз жүрөгү таанылбай.
Алтын шакек алмашылды каухарга,
Унутулду айткан сөздөр алтындай.

Чаңда жатты алтын шакек булганып,
Күн жарк этсе бир укмуштай нур чачып.
Кыз колунда каухар шакек баягы,
Өңдөн кетип өчө берди кумсарып.

Балким азыр жүрсө керек ошол кыз,
Бир жүрөгүн жүз шакекке алмашып.

Жаады алтын апапак кар жаңылык,
Ай нуруна, күн нуруна чагылып.
Кубанычта бөлөп сезим тазарткан,
Аппак карды биз күткөнбүз зарыгып.
Алтын карга ак тилекти кошолу,
Алоолонсун жакшылыктын очогу.
Ыр-күлкүнүн дүйнөсүнө бөлөнсүн,
Ырдап-бийлеп Жаңы жылды тосолу.

Жакшылыктын жарчысы бол, Жаңы жыл,
Эл-журттумдун бактысы бол, Жаңы жыл.
Ак сүйүүнүн ачкычы бол, Жаңы жыл,
Жаңы жыл...
Жараткандын белеги бол, Жаңы жыл,
Ар адамдын жөлөгү бол, Жаңы жыл.
Бейпилдиктин желеги бол, Жаңы жыл,
Жаңы жыл...

Жаңы жылдын койнунда көп жаңылык,
Кел Жаңы жыл, биз күтөбүз зарыгып.
Жаңы бакыт, жаңы таалай кучактап,
Жаңы жылым келе жатат жаңырып.
Кел досторум ырдап обон созолу,
Келгилечи үнгө, үндү кошолу.
Жаңы жылда жакшы жашоо жар болсун,
Жакшы ыр менен Жаңы жылды тосолу.

Ак-Талаа деп атын уксаң күлбөгүн,
Аппак эле топурак деп жүрбөгүн.
Көрбөсөң да көз алдыңа элестет,
Көркөмүнө кумарланткан гүлдөрүн.

Кайырма:
Атырдай жыттуу гүлдөрүң,
Абасы таза түндөрүң.
Алпештеп баккан энемдей,
Ак-Талаам, сенсиң сүйгөнүм.

Жайындасы жашыл килем жамынган,
Кышы аппак, күнгө жалт-жулт чагылган.
Түсү өңүндө түрлүү чөптөр буралып,
Тоо арасы толтура мал жайылган.
Кайырма:

Берекелүү, пейили кенен эл менен,
Ыр жаңыртып, ырыс чачкан жер менен.
Эмгек менен даңазалап атыңды,
Кең Ак-Таалам, сыймыктанам сени менен.
Кайырма:

Жолугуң кызыл эле,
Жамынып жыгылчудай чачтарың узун эле,
Көйнөгүң көгүш эле, көздөрүң деңиз эле,
Мага да башкалардай мамилең тегиз эле.

Тиштериң бермет эле, сөздөрүң шербет эле,
Ордуңду таппай калуу оюма келбес эле,
Күлгөнүң чырак эле, күлкүңчү булак эле,
Чарчабай тургум келчү чачыңдан сылап эле.

Жеткирип барар элем, эртиктеп калар элем,
Узаарда терезеңден уурданып карар элем,
Ортоксуң ак сырыма, ой болгун жакшы ырыма,
Ок болуп өмүр өтөр буйруксуз тагдырыма.

Аруусун сага бердим, ачуусун мага бергин,
Сен ушул кадырымда сезимде кала бергин...

Ойносом көңүл ток эле,
Ооматы ойдо жок эле.
От болуп күйгөн мезгилде,
Отуз жаш ойдо жок эле.
Абайлап жүрбөй кокустан,
Ашыпмын бүгүн отуздан.
Ой, эми шашпа кайда деп,
Артымдан жанат отуз шам.

Күлкүдөн кумар таркабай,
Кырк жашты салдым аркага.
Өмүрдүн кызык учурун,
Өткөргөн экем байкабай.
Салтанат күүсүн көп угам,
Шаңданып калам мен улам.
Кырчындай кыздар турганда,
Кырк жаштан өтүп не кылам?

Карылык деген кашаң ат,
Картайтат экен жакалап.
Картайтса мейли картайтсын,
Картайтпайт бизди махабат.
Оюмдун түбү бүтө элек,
Жаштыктын оту өчө элек.
Түшсө да бырыш чекеге,
Жүрөккө бырыш түшө элек.

Айдалып поезд барат алга карай,
Айланып карегиңден арбалам, аттиң.
Эл үчүн узак сапар, мен үчүн тузак сапар,
Жанымды жалгыз сага камчылайын.
Көңүлүм ооруп бүттү, көздөрүм жооруп бүттү,
Өзүңдү карай берип, Алтынайым, Алтынайым.

Жалгыздык кыйын болду, уктабагын,
Вагонго чиркелишкен суктанамын, аттиң.
Эл үчүн узак сапар, мен үчүн тузак сапар,
Өрттөнсөм мейли, сага тартылайын.
Көңүлүм ооруп бүттү, көздөрүм жооруп бүттү,
Өзүңдү карай берип, Алтынайым, Алтынайым.

Күпүлдөп поезд жанын сабап талбай,
Жүрөгүм алып учуп бараткандай, аттиң.
Эл үчүн узак сапар, мен үчүн тузак сапар,
Өкүнүч менен бүтөт арты дайым.
Көңүлүм ооруп бүттү, көздөрүм жооруп бүттү,
Өзүңдү карай берип, Алтынайым, Алтынайым.

Үшкүрөм калганыңа теңим болбой,
Үзүлбөс үмүтүм бар темир жолдой, аттиң.
Эл үчүн узак сапар, мен үчүн тузак сапар,
Арманым ушул ырга калтырайын.
Көңүлүм ооруп бүттү, көздөрүм жооруп бүттү,
Өзүңдү карай берип, Алтынайым, Алтынайым.