Кел, Жаңы жыл, келгениң куттуу болсун,
Ар бир үйгө береке, дөөлөт консун.
Ар кимдин ак тилеги орундалып,
Жалпы элимде жарык маанай, күлкү болсун.

Жаңы жыл келди ырдайлы,
Жаңы жыл берсин жыргалды.
Тынчтыкта элим жашасын,
Тартпасын эч ким муң-кайгы.

Жаңы жылда жаңырган ырлар болсун,
Жалпы элимдин жашоосу жыргал болсун.
Ырыс-кешик, ынтымак, биримдикте,
Жаш-карыга жарашып ыйман болсун.

Жаңы жыл аалам белгилеп,
Жарышып айтып ак тилек.
Арчаны баары айланып,
Арчадай жаштык берсин деп.

Эске салам ал күндөрдү,
Бирге жүргөн жайкы түндөрдү.
Бек кучактап, денеге кысып,
Алгачкы жолу өпкөндү.

Роза гүлүм, алгачкы сүйүүм,
Жүрөктөн чыккан ак сезим.

Өттү күндөр эсте калар,
Унутулгус закымдар.
Өппөсө экен роза гүлдү,
Ичти күйгүзүп башкалар.

Роза гүлүм, алгачкы сүйүүм,
Жүрөктөн чыккан ак сезим.

Көкүрөккө, көңүлүмө салбай ой,
Оо, Жараткан суранычым угуп кой.
Жөлөп турган, тиреп турган тирегим,
Ала-Тоомду, ата-энемди аман кой.
Оо, Жараткан, сактай көр!
Оо, Жараткан, сактай көр!
Жөлөп турган, тиреп турган тирегим,
Ала-Тоомду, ата-энемди сактай көр!

Жан дүйнөмө эми салбай эссиз ой,
Оо, Жараткан жалынычым угуп кой.
Өзүң жар бол, жамандыкты көрсөтпө,
Өмүрлүк жар, сүйгөнүмдү аман кой.
Оо, Жараткан, сактай көр!
Оо, Жараткан, сактай көр!
Өзүң жар бол, жамандыкты көрсөтпө,
Өмүрлүк жар, сүйгөнүмдү сактай көр!

Жаратканым жалынычым угуп кой,
Жүдөмүштүү жүрөгүмө салба ой.
Бар үмүтүм, ак тилегим жашоомдун,
Ай чырайлуу балдарымды аман кой.
Оо, Жараткан, сактай көр!
Оо, Жараткан, сактай көр!
Бар үмүтүм, ак тилегим жашоомдун,
Ай чырайлуу балдарымды сактай көр!
Ата-энемди, бир тууганды сактай көр!
Өмүрлүк жар, сүйгөнүмдү сактай көр!

Көл жээгинде ойлуу турам,
Ташты ургулайт толкундар.
Толкун болуп тарап кеткен,
Жандай ынак курбулар.
Көргүм келет көзүңөрдү,
Жаштык жанган, от жанган,
Куса болуп карай берем,
Ордуңарды бош калган.

Кыял күткөн кызык күндөр,
Калды алыс-алыста,
Башка-башка жолдор менен,
Кеттиңерби алыска?
Оо, курбулар, сагындырган,
Ар бириңди эстеймин,
Жылдыз сымал жанып турган,
Ал күндөрдү эңсеймин.

Жүрөбүз деп ойлогонбуз,
Түбөлүккө айрылбай.
Ар ким издеп өз бактысын,
Кеттик достор кайрылбай,
Көргүм келет көзүңөрдү,
Жаштык жанган, от жанган,
Куса болуп карай берем,
Ордуңарды бош калган.

Аттанган туулган жер үчүн,
Аттанган кутман эл үчүн.
Гүл коюп, эскер, ыйлап ал,
Уулуңар, жоокер эл үчүн

Кайырма:
Эстелик жанына келип,
Энелер ыйлабагыла.
Уулуңар тирүү биз менен,
Сезимди кыйнабагыла.

Жан берип кандуу кармаштан,
Кайткан жок, кайра батыштан.
Эстелик болду эми алар,
Түбөлүк отту жагышкан.

Кайырма:

Тосушуп таңды атарда,
Узатып күндү батарда.
Түбөлүк тирүү турушат,
Уулуңар биздин катарда.

Кайырма:

Андагы сөзгө ынаба,
Ал сөздөр жалган курама.
Кемчилдик кетсе кечирип кой,
Келип кет ушул жумада.

Жүдөдүм эңсеп кубара,
Жүрөктү өйүп убада.
Коогалуу күнгө калтырбай,
Конуп кет эмики жумада.

Ашыкча болбой убара,
Ачылсын көңүл кубана.
Айкашсын жаштык кезибиз,
Алып кет наркы жумада.

Ушак айтса ынаба,
Убайым тартып кыйналба.
Удургуп төгүн сөздөргө,
Келип кет ушул жумада.

Түркүн ыр шаңдуу жаңырып,
Дүркүрөп колдор чабылып.
Ырыстуу күндү жар салып,
Ыр дүйнөм барат агылып.

Кайырма:
Кубулжуй бергин, ырларым,
Кубантып жүрөк сырларын.
Жашоонун ыры - бул ырлар,
Жар салган жаштык жыргалын.

Кайрадан ырлар уланып,
Кадалат көздөр суранып.
Көл бойлоп бара жаткансып,
Көңүлдөр эргийт кубанып.

Кайырма:

Өскөн жер ырдан жашарып,
Өмүрлөр барат тазарып.
Мекеним тынчтык ырлары,
Гүл жайнайт күндө жасанып.

Кайырма:

Суу жаңыртып Ала-Тоонун жылгасын,
Талаа тыңшап торгойлордун ырдашын.
Жаз жадырап, мен турамын сумсайып,
Жазда неге келбей койдуң, кымбатым?
Келчи, келчи, сүйөр болсоң, кымбатым.

Жаркын гүлдөр жасалгалап кыр башын,
Жай чыгарып табигаттын сымбатын.
Жер жапжашыл, менин өңүм керсары,
Жайда неге келбей койдуң, кымбатым?
Келчи, келчи, сүйөр болсоң, кымбатым.

Дарак тагып түркүн мөмө сыргасын,
Суктандырды адамдардын кыйласын.
Күтүп жүрсөм жүзүм камдап өзүңө,
Күздө неге келбей койдуң, кымбатым?
Келчи, келчи, сүйөр болсоң, кымбатым.

Эки жүрөк бирин-бири тыңдасын,
Эзилишип, элжирешип жыргасын.
Керемет бар сенде кышты жай кылар,
Келчи, келчи, кыш чилдеде, кымбатым.
Келчи, келчи, сүйөр болсоң, кымбатым.

Билемин тилегиңди өс-өн деген,
Бир жаның мен деп канча көзөлбөгөн.
Апам, ай каруусунда уктап калсам,
Ойготуп аламбы деп жөтөлбөгөн.

Апам, ай апа десем ыргып турган,
Көзүмдөн кандайымды көрүп туйган.
Нан жапса күйгөн жерин өзү алып,
Бышканын, даамдуусун мага сунган.

Айттырган учкан желден саламды улам,
Башкача бабалактап барганымда.
Кийимдин эң жакшысын өзүмө арнап,
Тамактын майлуураагын берген мага.

Эч бир жан мени сендей көтөрбөгөн,
Бир жаның мен деп канча көзөлбөгөн.
Апам, ай каруусунда уктап калсам,
Ойготуп аламбы деп жөтөлбөгөн.