Эстеп, эстеп өткөн мезгил сабагын,
Ачкым келет ал күндөрдүн барагын.
Көздөп жүрүп максаттарга жетсем деп,
Келчү дайым эл ишине жарагым.

Адамдарда үмүт жашайт үзүлбөй,
Жакшылыктын жарык турган изиндей.
Терең ойлор келген менен сезимге,
Жүрөт тура бакыт бизге сезилбей.

Мезгил деген учкан куштай, жеткирбес,
Көңүлдөрдүн көксөөсүнө кеч кирбес.
Алыс калган тунук кыял жаштыгым,
Ал мен үчүн өмүр бою эскирбес.

Караймын көлдүн өйүзүн,
Кыйын го сени көрүшүм.
Кыйноону тарткан жүрөктүн,
Ачкычы, ачкычы жалгыз өзүңсүң.

Олтурам көлдүн боюнда,
Ойлор көп менин оюмда.
Кумдан көп ойго чөктүргөн,
Кымбатым, кымбатым, сенсиң оюмда.

Шилеймин көлдүн кумдарын,
Таркабай сенден кумарым.
Ачкычы сенсиң жүрөктүн,
Келсеңчи, келсеңчи, букет сунайын.

Канча жылдар жылып өтүп арадан
Жадыраган жаз жаңырды кайрдан
Көгүш нөшөр эске салды өзүңдү,
Кыйгач тийип тереземди сабаган.

Мезгилди эстейм пахта чабып биз жүргөн,
Сур булуттан жамгыр жашы күтүлгөн.
Башкалардын баары кетип экөөбүз
Жаанда калып кол кармашып жүгүргөн.

Кайырма:
Ызгаарына кабылганда турмуштун
Ызаландым өзүмдү-өзүм уруштум
Жылуу-жумшак мамилеңди көп эстеп
Өз ичимен азап чектим азап чектим тымызын.

Ал кулк мүнөз өктөм эле жаз кезим
Маани берип кадырыңды сезбедим
Жолдон чыккан азгырыкка жол берип
Сенде жүргөн өз бактымдан четтедим

Кайырма:

Сезимимде жашап жаркын элесиң
Ачтым бир топ бул өмүрдүн белесин
Табияттын тазарткандай жазгы жаан
Жан дүйнөмдүн жазы болуп келесиң.

Кайырма:

Жарык нурга дүйнөнү,
Жалгыз Алла толтурат.
Сен өзүңдөн тап аны,
Сени менен олтурат.

Кайырма:
Жаратканды сүйөмүн,
Жашым төгүп кудай деп.
Өмүр нурун сиңирип,
Жашайм шүгүр кудай деп

Суктандырган жандууну,
Суулар агат кудай деп.
Билсең ислам булбулу,
Күн-түн сайрайт кудай деп.

Кайырма:

Сүйүлөлү сүйөлү,
Сенек иштер жеңилдейт.
Эч бир жанга бул дүйнө,
Энчиленип берилбейт.

Кайырма:

Микробу жок тоолордун абасы да
Чындык жашайт наристе өңү менен
Бийик мөңгү арчалар арасына
Кетесиңби сулуу кыз мени менен

Күлүк минип барабыз гүл тергени
Бубактардын күлкүсүн үйрөнгөнү.
Терең ойдун маңызын берип турат
Тоолуктардын жөнөкөй сүйлөмдөрү.

Жүрөктөрдө жаштыктын оту барда
Дал өзүнө укмуштун жолугабыз
Чыгып барып эң бийип чокуларга
Жылдыздарга зымырап бой урабыз.

Микробу жок тоолордун абасы да
Чындык жашайт наристе өңү менен
Бийик мөңгү арчалар арасына,
Кетесиңби сулуу кыз мени менен.

Ай чыкканда балбылдап,
Айды көрсөм сени көрүп тиктей берем жалдырап.
Айдан табам элесиңди,
Айдан түшүп келесиңби?
Келесинби, келесиңби, келесиңби, жан эркем?
Келесиңби деги сен?

Суу жээгинен кучактап,
Сууну көрсөм сени көрүп тиктей берем кылчактап.
Суудан табам элесиңди,
Суудан чыгып келесиңби,
Келесиңби, келесиңби, келесиңби, жан эркем?
Келесиңби деги сен?

Аскадагы уларым,
Көрдүңөрбү, билдиңерби арчадагы булагым?
Кырдан издейм элесиңди,
Кырдан түшүп келесиңби?
Келесиңби, келесиңби, келесиңби, жан эркем?
Келесиңби деги сен?

Жылдыз болуп койнума,
Күлүп келчи, эркелетчи колуң коюп мойнума.
Жүрөк какшайт, не кылайын?
Кара көзүм, кагылайын,
Ананайын, ананайын, ананайын жан эркем,
Ананайын жан эркем.
Келесиңби, жан эркем?

Турмушта идиш-аяк кагышат дейт
А, биз болсо тирүү адам эмеспизби
Таарыныша кетебиз кээде экөөбүз,
Ала албай керектүүнү, керексизди
Чын эмеспи...

Билемин жакшы аялсың мээрими бар
Сүйгөндү сүйө билген сыйлай билген
Сендеги улуулукту, жылуулукту
Бир да адам бере албас айдан-күндөн.
Чын эмеспи...

Билип алгын жалгыз гана айыбыңды
Болбогон нерселерге көктүгүң бар
Сүйгөнсүп бүткүл аял заты мени
Күдүрөйт жүрөгүңдө кызгануулар
Чын эмеспи...

Ошондо мээримиңди ачуу жини
Сезимтал көңүлүңдө ызаа жанат
Булуугууң таркаганда кайра эле
Баладай эркелейсиң мунуң жагат.
Чын эмеспи...

Айлуу түн кимдерге экен, кимдерге экен?
А балким, ойносун деп бизге бекен?
Телмирип терезеңден карабастан,
Суу бойлоп келеличи келсеңчи эркем.

Булактын мөлтүр суусу кимдерге экен?
Булар да ичишет деп бизге бекен?
Сен барда башкалары көрбөсө деп,
Булактын шары менен бирге кетем.

Өмүрдүн аккан балы кимдерге экен?
Өздөрү ичишет деп бизге бекен?
Өтсө күн өмүр өтүп баратпайбы,
Өлбөскө бал ичели келсеңчи эркем.

Бак аралап баратсам алды жактан,
Көрүндүң да боюңду не түзөдүң.
Көркүң менен көп жылдар чарчоо баскан
Жүгүн алып ыргыттың сен жүрөктүн
Ошондогу келбетиң кер маралдай
Ашык болуп арманда мен жүрөмүн.

Билсем деле жаш жактан айырманы
Сезим, эрким өзүмө баш ийбеди
Тоо артынан чыга келген айдай болуп
Көрүнүшүң көңүлүмдү бүт бийледи
Кантеп эми кайран жаш кыртан ашып
Кыйналганым жароокер же билсечи

Гүлү болсоң сүйүүнүн жаңы ачылган,
Бапестейин багбанын болуп гана
Суусу болсоң булактын мөлтүрөгөн
Дайра болуп агайын кошул мага.
Эч ким билбес жүрөктө оргуштаган
Ырдалайын сүйүү ыры болуп сага.

Кантеп эми кайран жаш кыртан ашып
Кыйналганым жароокер же билсечи